Amics legedors,

Lo brumalh hred e escuranhós qui s'a minjat los dias qu'a la color de las meas pensadas au moment de v'adreçar las vòtas. L'an 2018 just acabat qu'a tirat tà la lutz totas las problematicas vitaus qui's pausan au monde de uei e que dobti mei anar mei que'ns vediam vias de las sobrar. Au més de junh l'urgéncia de lutar contra l'arrecauhament climatic que's brembè aus poblants de Salias, atucats peu delubi e un aigat shens parion. Quauques més mei enlà e un cambiament de menistre a Paris, la protèsta deus "Gelets jaunes" non deishè pas nat dobte sus la volontat cinica deus poderós de har pausar suu pòple sonque, tots los esfòrç e sacrificis necèras tà la famosa transicion ecologica, au risc precisament de montar lo pòple contra l'ecologia. Au lonc de l'an de totas parts, senhaus de soviéner que'ns arribèn. L'umanitat a petits drins que's perd l'ahida, secutada per aquèra medisha politica hastiau qui maumia autanplan los individus com la natura e qui horneish electors a grans carretadas aus nacionalistes, aus xenofòbs, aus climatosceptics e aus extremistes de tot pèu.

Tanben abans de'vs deishar anar peus camins de 2019, qu'avèvi un tropet de mots a'vs díser. Ne sauvaram pas arren contra los pòples, per questionar la susvita de l'umanitat la luta contra l'arrecauhament climatic qu'ei perduda per avança se la màger part deus individus la viven com ua punicion, ua pèrta de libertat, ua despensa costrenhuda senon un raubatòri enlòc d'i véder ua escadença e d'i auburar un interés personau. Pr'aquò que'm sembla que'ns cau a tot hòrt conjugar lo combat per l'ecologia e las lutas sociaus e d'emancipacion e que'ns condamnan a mauescàder los qui'ns disen que's pòt sobrar la crisi ecologica shens s'atacar a la condicion umana. Los ans que passan, las nostas possibilitats d'escaduda que demeseishen au briu de las COPs cahuradas per l'egoïsme deus Estats e lo poder deus grops de premuda e lo mauparat que's quilha en suspart de l'umanitat com lo vagat d'un tsunami.Tà l'an 2019 qui comença que voi créder tots los umans conscients e de volença, non solament los militants associatius qui an déjà entinoat la transicion ecologica suu plan personau e collectiu, mes tanben los ciutadans sensibilizats que saberàn aparar totas las iniciativas e accions dens aqueth hèit, perfin de manifestar clar la volontat deu pòple e de forçar las decisions deus politics quin que sian. Permor los politics de uei que son pragmatics e ne van pas jamei contra la volontat majoritaria de l'elector, per pòc qu'aquesta sia hòrta e clara. Qu'ei, ce'm sembla, la nosta miélher possibilitat d'escaduda, senon la sola.

Bona annada 2019 a tots ! Coratge !