Adishatz,

Dens lo vam d'introspeccion e de debatuda qui s'ei apoderat lo país au darrèr deu sagnatòri de Charlie Hebdo, mantun còp que pensèi au Roger Lapassada, dab qui avoi quauquas discutidas de las preciosas quan l'anavi vesitar a la villà Amistat en Ortés e que'vs voi liurar aqueths motets lhèu inedits permor que'm semblan de natura a avitar la pensada de cadun...

"Que vivi la mea identitat com ua superposicion de cercs concentrics qui non se sarran ni s'excludeishen los uns ès autes. Que soi Biarnés permor d'estar vadut en Aussaviela e de demorar en Ortés. Que soi Gascon permor estar Biarnés qu'ei estar Gascon, Occitan permor d'estar Gascon. Que soi tanben Francés, Europèu e que'm senteishin autan plan ciutadan deu monde. Arron l'istòria de l'umanitat, hèra de dramas que son lo hèit de conflictes d'identitat au perhons deus individus..."

Dans le mouvement d'introspection et de grands débats qui s'est emparé du pays après la tuerie de Charlie Hebdo, à plusieurs reprises il m'est arrivé de penser à Roger Lapassade, avec qui j'avais eu quelques discussions très riches lorsque j'allais lui rendre visite à la villa Amistat d'Orthez. et je tiens à vous partager ces propos peut-être inédits dans la mesure où ils me semblent de nature à nourrir la réflexion de chacun.

"Je vis mon identité comme une superposition de cercles concentriques qui ne se compriment ni ne s'excluent les uns les autres. Je suis Béarnais parce que je suis né à Aussevielle et j'habite à Orthez. Je suis Gascon parce qu'être Béarnais c'est être Gascon, Occitan parce que je suis Gascon. Je suis aussi Français, Européen, et je me sens tout aussi bien citoyen du monde. Tout au long de l'histoire de l'humanité, beaucoup de drames sont le résultat de conflits d'identité au sein des individus..."

Vocabulari de purmèra necessitat :
Roger Lapassada, (1912-1999)
(Que’s pòt arrevirar en totas lengas.)

 Que soi un òmi,
Qu’aimi la vielha planeta
E la mar qui’n hè lo cutorn.
Mes lo troçòt ont soi a noste
Qu’ei lo Bearn ont soi vadut.
Que soi un òmi dab la peth blanca,
E n’ei pas la mia fauta !
Tots que siam negres o roges
Jaunes o blancs,
O pigalhats o shens color,
Que naishem e morim de medisha faiçon,
Prestits qu’èm de parièra pasta
Dab lo boridèr de l’amor.
Que soi un òmi,
E que voi har petar las travas
Qui sarran las lengas mairanas,
Los còs, los mots e las pensadas ;
Las cadenas dont èm carcats
Que las volem har esclatar
Entà tornar trobar la Hida
Entà tornar trobar la Vida
Libra e nosta vielha dignitat.

Aquiu qu’as lo vocabulari
de purmèra necessitat
Shens lo quau, òmi qui que sia,
N’ei qu’un cocarro fresc crestat !