Dens la dusau tirada de las annadas 90, Pau que s'avivava enquèra d'auburis plasents e pintorescs. Atau, l'arribada de l'ivèrn que's sagerava peu torn d'un aulhèr apitranglat sus un petahum, dab los sons cans e las soas paucas aulhas. Barbalonga, pèu anerat, maishèra escarbalhada, los qui l'avèn parlat que disèn que devarava de la vath d'Aussau. Uns sers qu'apariva que's juntèsse a la hora deus estudiants qui virava e arrevirava peus estanquets deu quartièr Maiòlis...

Qu'eram en 1996 o 1997, un divés ser, lo noste òmi qu'estremè la soa cavala davant la cerveseria qui s'aperava lavetz Le Drakar. Quan entrè au pub Le Garage, que's vedè qu'èra briac. Aquiu, vestit de perissas, esclòps de punta aus pès e bonet pihat suu cap, que's gahè a tornejar suu son baston d'averanhèr devath los uelhs de las practicas enlobatadas. En tocant drin las aucas, que hasó mantuns "branlos", shens dar-se'n deu díser deu monde ni deus espataquets d'arríder qui los sons gestos desestrucs e las soas cadudas e desclaveravan.

Quan avó hèit, lo pastor que virè lo telon tot com èra entrat dab aqueth espiar maliciós qui avè tostemps. Au dehòra que començava de nevar a bèths plumalhs. Contra l'avis deu desforalhaire, qui l'estat de briaguèra e herucava, que desmarrè la petroleta e que s'aviè. Totun, just s'avè hèit cinc mètres que s'espataquè au bèth miei deus cabeders e deus sacs de lordèras. Aquò rai, que s'arrequilhè e lèu la crabotejada de la soa atruna que s'ataisè hens lo brum de la nèu qui cadè mei anar mei espés. Ne'u tornèn pas jamei véder, ni per Pau, ni per las estivas d'Aussau...